નંદેસરી પોલીસ મથકની શી ટીમની વડીલ વંદન:નિવૃત્ત કામદારને ૨૬ વર્ષથી અટકેલું પેન્શન અપાવ્યું...

         વડોદરા શહેર પોલીસની શી ટીમ મહિલા અને બાળકોની સુરક્ષાની સાથે તેમની અને વડીલોની વિવિધ મુશ્કેલીઓનું નિવારણ કરે છે.તાજેતરમાં નંદેસરી પોલીસ મથકની શી ટીમની સકારાત્મક દખલ થી એક વડીલ કામદારનો ૨૬ વર્ષથી અટવાતો પેન્શનનો પ્રશ્ન હલ થયો છે.

        વડીલ હસમુખભાઈ ત્રિવેદીએ પહેલા ૧૯૭૬ થી ૧૯૯૬ સુધી અમદાવાદની  માણેકલાલ હરિલાલ મિલમાં નોકરી કરી હતી.તે પછી તેઓ નંદેસરીની  ફ્લોરિટેક કંપનીમાં ૨૦૦૪ થી ૨૦૧૪ સુધી કામ કરીને નિવૃત્ત થયાં અને આ નોકરીનું પેન્શન પણ ચાલુ થઈ ગયું.

        પરંતુ અગાઉ અમદાવાદ ની મિલમાં કરેલી ૨૦ વર્ષની નોકરીના પેન્શનનો પ્રશ્ન હલ થતો ન હતો.

        તેમણે શ્રમ વિભાગમાં નીચલા સ્તરે થી ઉચ્ચસ્તર સુધી રજૂઆત કરી પણ તેમના કહેવા પ્રમાણે ઉકેલ મળવાને બદલે તેમને હડધૂત કરવામાં આવ્યા.

        આખરે છેલ્લા ઉપાય તરીકે તેઓ પોતાની સમસ્યા લઈને વડોદરા શહેર પોલીસ કમિશનર પાસે જૈને પોતાના પેન્શનનો પ્રશ્ન ઉકેલવા રજૂઆત કરી.

        તેને અનુલક્ષીને પોલીસ કમિશનરશ્રી ની સૂચના થી નંદેસરી પોલીસ મથકની ટીમે,તેમને સાથે રાખીને શ્રમ વિભાગ સાથે આ પ્રશ્ન હાથ ધર્યો.

        આખરે શી ટીમની મદદ થી તેમના ૨૬ વર્ષથી અટવાયેલા પહેલી નોકરીના પેન્શન ના પ્રશ્નનું નિરાકરણ થયું.

        તેમણે શહેર પોલીસ કમિશનરશ્રી,નંદેસરી પોલીસ મથકના અધિકારીઓ અને શી ટીમનો દિલથી આભાર માન્યો છે.